U-1341-05-28-0001
1341 Mai 28, Cilli
Regest
Transkription
Wir Graf Friedreich von Cyli veriehen vnd tuen chunt mit diſem prief allen den di in ſehent oder hoͤrent leſen, daz wir vnd vnſer hauſvrawe .. vnd vnſer erben, hern Hanſen von Reihenek ertzbrieſter im Sevntal vnd pfarrer z Laybach, vnd ſeins brueder hern Merten ſaelig chinden vnd iren erben, verchauft habn vm ain guet des wir gaͤntzlich gewert ſein, den tail an der veſt Preſing, den wir ee chauft heten von Eberharten dem Preſinger, vnd den tail an dem purchſtal hinder der veſt, vnd den staincheler vor der veſt gelegn, vnd den tail an dem voͤrſt, vnd ain hofſtat an dem graben gelegn, vnd vier hofſtet ze Chlepeiz gelegen vnd den weyer vnder der veſt, vnd den halben paumgarten vor der veſt, vnd den paumgarten vnder dem weyer vnd den tail an dem walde gegen Pluemenſtain, vnd den tail an dem wald ob der veſt vnd wiſmad vnd paw an der alben ob der veſt vnd den tail an dem purchſtal ob Symons paumgarten, vnd den tail an dem paumgarten vnder dem ſelben purchſtal, vnd halbez geroͤvt, ob der veſt, oberhalb des wegs, vntz an des hertzogen pimerch, daz haben wir in allez zechauffen gebn, vnd loben in daz vertreten vnd ſchermen vor aller anſprach nach landes recht. Taet wir des nicht, welchen ſchaden ſev des nement den ir ainer bei ſeinn trewen ſagt, den ſulle wir in ablegen, vnd ſullen den haben auf vns auf vnſern trewen, vnd auf alle dev wir haben. Wir haben auch di obgeſchriben gueter auf geſant vnd ſentens auf mit diſem prief vnſerm heren .. dem pyſcholf ze Gurk von dem ſev zelehen ſint daz er in leihe ze rechtem lehen. Dar uber geben wir diſen prief mit vnſerm anhangdem inſigel verſigelten ze vrchund der warhait, der geben iſt datz Cyli nach Chriſts gebuerd drevtzehenhundert iar, dar nach in dem ain vnd vierzigistem iar, des montags in den pfingſtveirtagn.
Archivvermerke
Graf Friedrich von Cilj
pro Reichenegken vmb Preſing
1341
Prothe khaufbr 28. May
Beschreibung
Perg., 24 x 9 cm
1 Sig. pend. Graf Friedrich I. von Cilli, ungefärbtes Wachs, rund, 28 mm
Überlieferung
Ausfertigug
Arhiv Republike Slovenije, Zbirka listin, 1341 V 28 (SI AS 1063/5794)
ehemalige Signaturen ARS: RI/28
vormals: Haus-, Hof- und Staatsarchiv, Allgemeine Urkundenreihe, 1341 V 28 (bis 1983?)
Literatur
Hans Pirchegger, Die Untersteiermark in der Geschichte ihrer Herrschaften und Gülten, Städte und Märkte (Buchreihe der Südostdeutschen Historischen Kommission 10). München 1962, S. 230f. Nr. 213.
