Göth Regesten Steiermark 259
Georg Göth, Urkunden-Regesten für die Geschichte von Steiermark vom Jahre 1252 bis zum Jahre 1580. In: Mittheilungen des historischen Vereines für Steiermark 5-13 (1854-1864).
259. 1389. 14. Martii. Joannes DEJ gratia, Sanctae Aquilegensis Ecclesiae Patriarcha, Deuoto nobis in Christo Dilecto Vrbano de Loss Presbytero gratiam nostram cum salute. Morum honestas, uitae laudabilis et honestae conuersationis assertio, et sufficientia scientiarum, quibus apud nos fide dignorum commendaris testimonio, nos inducunt, ut tibi in largitione gratiae reddamur liberales. Cum itaque parochialis Ecclesia Sancti Stephani in Reifniz nostrae Aquilegensis Dioecesis, cui imminet cura animarum, ad praesentationem spectabilis Comitis de Ortenburg pro tempore existentis, et ad nostram collationem seu prouisionem spectans, per mortem Nicolai Presbyteri ultimi et immediati eiusdem parochialis Ecclesiae plebani et Rectoris, uacare noscatur de praesenti, nos uolentes tibi gratiam facere specialem, ad praesentationem et humilium precum instantiam spectabilis et nobilis Friderici Comitis de Ortemburg, tibi dictam parochialem Ecclesiam in Reifniz cum omnibus suis iuribus et pertinentiis conferimus, donamus et confirmamus, teque praesentibus nostris Litteris inuestimus de eadem, tibi curam animarum et administrationem bonorum omnium tam spiritualium quam tempralium committimus etiam et assignamus. Et ut huiusmodi nostrae gratia suum sortiatur debitum effectum, honorabili Joanni de Mila, Reueremdi Patris, domini Episcopi Tridentini Secretario nobis in Christo dilecto committimus et mandamus, quatenus requisitus per te uel alium, te uel procuratorem tuum nomine tuo in tenutam et corporalem possessionem dictae parochialis Ecclesiae, omniumque iurium et pertinentiarum eiusdem inducat et defendat inductum, faciatque tibi uel procuratori tuo de omnibus et singulis fructibus, redditibus, et prouentibus et iuribus ac obuentionibus uniuersis eiusdem Ecclesiae in Reifniz, amoto exinde quolibet illicito detentore plene et integraliter responderi, saluo semper iure nostro, nostraeque Aquilegensis Ecclesiae et alterius cuiuscunque, contradictores uero et rebelles auctoritate nostra per censuram ecclesiasticam compescendo. Harum sub nostri appensione sigilli testimonio litterarum. Datum in nostro Patriarchali Palatio in nostra ciuitate Austriae nostrae Dioecesis praedictae. Anno Domini Millesimo trecentesimo ocuagesimo nono, die quarta decima mensis Martij, duidecima Indictione. Tom. IV. p. 688.
